អាមេរិក៖ រដ្ឋាភិបាលសហរដ្ឋអាមេរិកបានបញ្ជាក់់នៅថ្ងៃនេះថា រាល់តម្រូវការចាំបាច់នៃការធ្វើតេស្តកូវីដ-១៩ ទៅលើអ្នកដំណើរមកពីប្រទេសចិនដែលរដ្ឋាភិបាលអាមេរិកទើបបានប្រកាសអនុវត្តកាលពីពេលថ្មីៗនេះ គឺផ្អែកលើមូលដ្ឋានវេជ្ជសាស្រ្ត និងវិទ្យាសាស្រ្តសុទ្ធសាធ និងដោយផ្អែកលើកង្វះព័ត៌មានជាក់លាក់ពីទិន្នន័យនៃការឆ្លងកូវីដ-១៩ ក្នុងប្រទេសចិនដូចគ្នា។
ការលើកឡើងខាងលើ បន្ទាប់ពីពេលថ្មីៗនេះ ប្រទេសចិនបានថ្កោលទោសទៅលើវិធានការសុខាភិបាលពីបណ្តាប្រទេសមួយចំនួនទៅលើអ្នកដំណើរមកពីប្រទេសចិន ជាវិធានការដែល "មិនអាចទទួលយកបាន" ពោលគឺរយៈពេលត្រឹម ២ថ្ងៃប៉ុណ្ណោះបន្ទាប់អាជ្ញាធរសុខាភិបាលអាមេរិក បានតម្រូវឱ្យរាល់អ្នកដំណើរទាំងអស់មកពីប្រទេសចិន រាប់ចាប់ពីកុមារអាយុ ២ឆ្នាំឡើងទៅ ត្រូវតែមានបង្ហាញលទ្ធផលតេស្តអវិជ្ជមានកូវីដ-១៩ ជាមុនសិន មុននឹងអនុញ្ញាតឱ្យចូលទៅកាន់ប្រទេសរបស់ខ្លួន។
លោក Ned Price អ្នកនាំពាក្យរដ្ឋាភិបាលបាននិយាយថា៖ "នេះជាវិធីសាស្ត្រដែលផ្អែកលើវិទ្យាសាស្ត្រទាំងស្រុង"។ ក្នុងប្រសាសន៍ដែលសំដៅដល់ប្រទេសចិន លោក Price បានបន្ថែមថា៖ "វិធានការនេះមានការផ្តោតខ្លាំងទៅលើបញ្ហាសុខាភិបាលសាធារណៈ ត្បិតបច្ចុប្បន្នបញ្ហាកង្វះទិន្នន័យពីការឆ្លង ការវិវត្តន៍នៃពូជរបស់មេរោគ គឺជាអ្វីដែលយើងមានការព្រួយបារម្ភខ្លាំង"។
បន្ថែមពីលើនេះ លោក Ned Price បានបញ្ជាក់ថា ភាគីរដ្ឋាភិបាលអាមេរិកបានត្រៀមខ្លួនរួចជាស្រេចក្នុងការផ្តល់នូវវ៉ាក់សាំងបង្ការកូវីដ-១៩ ជូនទៅរដ្ឋាភិបាលចិន ខណៈដែលវ៉ាក់សាំងដែលគ្រោងនឹងផ្តល់ជូនប្រទេសចិននាពេលនេះគឺជាវ៉ាក់សាំងដែលប្រើប្រាស់ជាលក្ខណៈសកលលោក ដែលអ្នកជំនាញផ្នែកសុខភាពបានអះអាងពីផលប៉ះពាល់តិចតួចប៉ុណ្ណោះ៕
